You are here

Հավերժ է Վարդանանց ոգին, իսկ ներշնչանքը՝ հավերժացնող

 «Միաբանությունը բարի գործերի մայրն է, անմիաբանությունը` չար գործերի ծնողը»
                                                                                                                                         Եղիշե
 
Փետրվարի 27-ին ՀՀ ԿԳՆ ‹‹Ընտանիք›› մանկապատանեկան ստեղծագործական կենտրոնում անցկացվեց «Հավերժ է Վարդանանց ոգին, իսկ ներշնչանքը՝ հավերժացնող» խորագրով միջացառում ՝ նվիրված  Դ. Դեմիրճյանի 140-ամյակին: Նպատակն էր սաների մեջ սերմանել հայրենիքն ու քրիստոնեական հավատը սրբորեն պահպանելու գաղափար, նախնիների օրինակը ծառայեցնել  քաջարի ու անվախ սերունդ դաստիարակելու գործընթացին:
Միջոցառումը սկսվեց Դերենիկ Դեմիրճյանի և նրա ստեղծագործության գլուխգործոց «Վարդանանք»  պատմավեպի վերաբերյալ համառոտ տեղեկությունների հաղորդմամբ:   Միջոցառման մասնակիցներն առաջնորդվելով ‹‹վասն հավատո, վասն հայրենյաց›› կարգախոսով, ներկայացրին հայ ժողովրդի հոգևոր կյանքի անկախության, հավատի և խղճի ազատության համար մղած պայքարը, ազգային ինքնությանը հավատարիմ մնալու կամքը և դժվարին փորձությունների դիմակայելու պատրաստակամությունը:
Վարդանանց հերոսների կերպարները մարմնավորած սաները ներկաներին փոխանցեցին նրանց վսեմ և առաքինի շունչը, ինքնակամ ու գիտակցաբար մահվանն ընդառաջ գնալու և դրանով իսկ անմահանալու խորը գիտակցությունը: Տպավորիչ էր «Սպարապետ Վարդան Մամիկոնյանի» հորդորն իր զինվորներին, որով կոչ էր անում չերկնչել ու չվախենալ հեթանոսների բազմությունից, կռվել մինչև արյան վերջին կաթիլը և լինել միաբանված:
Կենտրոնի սաները գիտակցեցին, որ պետք է լինել Վարդանանց ոգու արժանի կրողներ, քանզի այն առհավատչյան է մեր հարատևման և հաղթանակների: 
 
 
Հ. Սարգսյան 
 
 
  
 
 
 
 
 
 
 
 
 
 
 
 
27/02/2017