Գյումրին ամեն մի գյումրեցու, շիրակցու բնակատեղին է,
Սեպտեմբերի 5-ին մեծ շուքով նշվեց «Գյումրու օր» ամենամյա տոնակատարությունը:
ՀՀ ԿԳՆ Գյումրու «Ընտանիք» մանկապատանեկան ստեղծագործական կենտրոնն իր ակտիվ մասնակցությունն ունեցավ քաղաքի մշակութային օջախներում և հասարակական վայրերում կազմակերպված միջոցառումներին:
Յուրօրինակ այս նախաձեռնությունը նպատակ ուներ ծառայելու ազգային ավանդույթների, արհեստի և արվեստի վերականգմանն և պահպանմանը, ազգային մշակույթը, ծեսերն ու տոները ավելի կազմակերպված դարձնելուն` որպես քաղաքի զարգացման գրավական:
Ավ. Իսահակյանի և Հ. Շիրազի անվան տուն-թանգարաններում կենտրոնի խմբակների սաների կողմից ցուցադրվեց գորգի, կարպետի, կավե և արծաթյա զարդերի պատրաստման աշխատանքային գործընթացը:
«Քաղաքի օր» տոնակատարության շրջանակներում, ավանդույթ դարձած «Հացի փառատոն»-ին, ժողովրդական և ազգագրական երգ ու պարով հանդես եկան «Ընտանիք» կենտրոնի համույթները: Ելույթներն իրենց մեջ արտացոլում էին հայ ժողովրդի ոգին և նվիրումն ազգային ավանդույթներին: Իսկ ցուցասրահում տեղ գտած տարբեր խմբակների սաների ձեռքի թեմատիկ աշխատանքները մտքի և ձեռքի ինքնատիպ արարումներն էին, որոնք հաստատում էին հայի ստեղծագործ ինքնությունը, նրա արարիչ ոգին:
Ուշագրավ էր, Շիրակի մարզպետ Ֆելիքս Ցոլակյանի հիացական վերաբերմունքը «Ընտանիք» ՄՊՍ կենտրոնի ներկայացրած յուրօրինակ ցուցադրության վերաբերյալ:
Սեդա Հակոբյան
15/10/2015