Դասը նպատակ ուներ ծանոթացնել Շերամի աշուղական արվեստին, արժևորել նրա ստեղծագործական գործունեությունը որպես հայկական մշակութային հարստություն:
Ցերեկույթը բացվեց երգարվեստի և պարարվեստի խմբակների սաների համատեղ պատրաստած գեղարվեստական ելույթով և շարունակվեց Շերամի մասին պատմող փոքրիկ տեսանյութի ցուցադրմամբ:
Հայկական երաժշտական գործիքի միջոցով դուդուկի խմբակի սաները յուրովի մատուցեցին գուսան Շերամի ստեղծած արժեքավոր, «մետաքսանման» երգերը՝ համեմելով այն նրա կենսագրության գեղեցիկ հուշերով:
Գյումրեցի վարպետի նախընտրած պարզ ու թեթև ստեղծագործությունները սաները նույնքան պարզ ու մաքրամաքուր կենդանի կատարմամբ փոխանցեցին հանդիսատեսին՝ նրանց մոտեցնելով Շերամի աշուղական արվեստին և պատճառելով մեծ բավականություն ու հիացմունք:
Բաց դասի ավարտին կենտրոնի տնօրեն Արթուր Մինասյանը շնորհավորեց երիտասարդ դուդուկահարներին՝ աշուղական արվեստն ուշադրության արժանացնելու, Շերամի ստեղծագործությունները հավուր պատշաճի ներկայացնելու և մեծանուն ստեղծագործողների արժանի հետնորդներ դառնալու ձգտման համար:
«Մենք բարոյական պատասխանատվություն ենք կրում մեր հնամենի մշակութային ժառանգությունը պահպանելու և փոխանցելու հաջորդ սերունդներին». ահա այս կարգախոսն էր ընկած միջոցառման առանցքում, որը դասի մասնակիցները խոստացան պատվով շարունակել:
Հ. Սարգսյան
23/03/2018