You are here

Ուսումնական տարվա ամփոփում

Հուլիսի 6-10-ը Գյումրու ‹‹Ընտանիք›› մանկապատանեկան ստեղծագործական կենտրոնում անցկացվեց  2014-2015  ուսումնական տարվա  ընթացքում  կատարած աշխատանքների ամփոփում՝ հաշվետու ելույթներ  գեղարվեստական խմբերի կատարմամբ և սաների ստեղծագործական աշխատանքների  ցուցադրում:
Կենտրոնի տարբեր խմբակների սաների աշխատանքների ցուցադրությանը զուգահեռ Գոգհովիտ, Ցողամարգ և Թորոսգյուղ համայնքներում ևս ցուցադրվեցին նորաստեղծ գեղանկարչության խմբակների սաների աշխատանքները, որի միջոցով գնահատվեց և ստուգվեց սաների յուրացրած գիտելիքների, կարողությունների և հմտությունների մակարդակը: Մասնագետների ջերմեռանդ և անմնացորդ աշխատանքի նվիրման արդյունքն ակնհայտ էր. դրա մասին էին վկայում համայնքի բնակիչների և արվեստասեր հանրության արձագանքները, որն ավելի պարտավորեցնող էր թե՛մասնակիցների,  թե՛ մասնագետների համար: 
 <Ընտանիք> կենտրոնի դահլիճում կայացած հաշվետու համերգին  ներկա էին արվեստի գործիչներ, համայնքների ղեկավարներ, դպրոցների տնօրեններ, մանկավարժներ, ծնողներ: Իրենց գեղեցիկ կատարումներով հանդես եկան կենտրոնի  Գյումրի քաղաքում,  Շիրակի մարզի գյուղական տարբեր համայնքներում և Աշոցքում գործող պարարվեստի խմբակների սաները: 
Կենտրոնի տնօրեն Արթուր Մինասյանը իր ելույթում շնորհավորեց այն սաներին, ովքեր առաջին անգամ էին  բեմ բարձրանալու, ապա շարունակելով խոսքը նշեց, որ համայնքներում պարային խմբակները ձևավորվել են վերջին ամիսների ընթացքում և կարճ ժամանակահատվածում կենտրոնին հաջողվել է իր հովանու ներքո հավաքված սաներին կրթել և  դաստիարակել,  բացահայտել նրանց տաղանդն  ու շնորհները,  նաև կերտել՝ հայեցի ոգի ու գիտակցություն, որը  խմբավարների քրտնաջան աշխատանքի արդյունք է:
Ներկաների սպասելիքներն արդարացան, ակներև էր ցանկալի արդյունքը. չնայած, ինչպես փաստեց  կենտրոնի տնօրենը, անելիքներ դեռ շատ կան:
Ցուցադրական ելույթներով հանդես եկան նաև մարտական արվեստի խմբակի սաները, ովքեր ցուցադրեցին իրենց հմտությունները  արտահայտելով հոգու, մտքի ու մարմնի համադրումն՝ ինքնատիրապետման հասնելու համար: Այս ամենն ապահովեց բարձր տրամադրություն և հագեցած մթնոլորտ:
Շնորհակալական խոսքով հանդես եկան Ցողամարգի միջնակարգ դպրոցի տնօրեն Ա. Արշակյանը, վաստակաշատ մանկավարժ Թ. Դարբինյանն ու Թորոսգյուղ համայնքի պարարվեստի խմբակի սան Վ. Գրիգորյանը: Նրանք իրենց երախտիքի խոսքը հղեցին ‹‹Ընտանիք›› կենտրոնի տնօրինությանը ծավալած գործունեության և որդեգրած առաքելության, տարիներ շարունակ մատաղ սերնդի կրթման ու դաստիարակման գործում հսկայական ջանք ու եռանք ներդնելու համար, որի արդյունքում ակնհայտ է ինչպես Գյումրի քաղաքի, այնպես էլ համայնքների դեռահասների  ինտելեկտուալ առաջընթացն ու զարգացումը,  գյուղական կյանքի աշխուժացման նպաստումը:
 
Հ. Սարգսյան