Ծրագիրը նպատակ ունի համայնքներում բացահայտել արհեստի և արվեստի ոլորտում նախընտրելի մասնագիտությունները, նպաստել ազգային արհեստի և արվեստի տարածմանն ու պահպանմանը, ուղղորդել դեռահասներին մասնագիտական կողմնորոշման հարցում և նպաստել նրանց կարողությունների բացահայտմանը և կարևորել արտադպրոցական կրթության դերը դեռահասների համակողմանի և ներդաշնակ զարգացման գործում:
Կենտրոնի մասնագետները ու շնորհալի սաներն իրենց փորձը, գիտելիքներն ու հմտությունները փոխանցեցին համայնքների մանկավարժներին և դեռահասներին: Վերջիններս ոգևորված ու խանդավառված, մեծ հետաքրքրությամբ ու սպասումով մասնակցեցին արհեստի ու արվեստի տարբեր ճյուղերի՝ գեղանկարչության, ուլունքագործության, խեցեգործության, կարպետագործության, ասեղնագործության, գոբելենագործության, բատիկայի, վիտրաժային նկարչության, փայտարվեստի, ռադիոէլեկտրոնիկայի, մարտական արվեստի, պարարվեստի դասերին: Դեռահասների հետ համատեղ մանկավարժները ևս մասնակցեցին գործնական վարպետաց պարապմունքներին: Ծրագրի շահառուները հնարավորություն ունեցան ընդլայնել իրենց հետաքրքրությունների շրջանակը, բացահայտել նախասիրություններն ու ունակությունները: Նրանից շատերն առաջին անգամ էին ծանոթանում արհեստի ու արվեստի ոլորտում տարբեր մասնագիտությունների: Դեռահասների և մանկավարժների հավաստմամբ համայնքներում առկա են երեխաների զբաղվածության ապահովման և ինքնարտահայտման հնարվորություն ընձեռելու խնդիրներ։ Այս առումով կարևորվեց նմանատիպ ծրագրերի անցկացումը համայնքներում:
Դպրոցականների ցանկությունն ու առաջարկը մեկն էր՝ ծրագիրը լինի շարունակական, որով կապահովվի իրենց նպատակային զբաղվածությունը:
«Ձեր այցն այսօր մեծ հետաքրքրություն առաջացրեց աշակերտների շրջանում: Նրանք հաճույքով մասնակցեցին դասերին: Որպես մանկավարժ շատ բարձր եմ գնահատում նման այցերի կազմակերպումը, որոնք օգնում են մասնագիտական կողմնորոշման և գեղագիտական ճաշակի զարգացման հարցում: Ցանկալի է, որ նման այցելությունները լինեն հաճախակի: Շնորհակալություն մեր համայնքն ընդգրկելու և ուշադրության արժանացնելու համար»,-իր կարծիքն արտահայտեց Ձորաշենի միջնակարգ դպրոցի մանկավարժ Նարինե Մարտիրոսյանը:
Նշենք, որ ծրագրի 1-ին փուլը կշարունակվի մինչև մայիսի 10-ը:
Հ. Սարգսյան
17/04/2019