«Մշակույթի վարպետը» ծրագրի շրջանակում մեկնարկեց նաև մարզային շրջագայություն

«Մշակույթի վարպետը» ծրագրի շրջանակում մեկնարկեց նաև մարզային շրջագայությունը, որի առաջին կանգառը Վայոց ձորի մարզի Եղեգնաձոր համայնքն էր։ «Երաժշտություն, որ քայլում է մեզ հետ» խորագրով համատեղ գեղարվեստական միջոցառումը տեղի ունեցավ Եղեգնաձորի մշակույթի տանը։ Միջոցառմանը հանդես եկան համայնքի մշակութային հաստատությունների համույթները՝ ներկայացնելով բազմաժանր և հագեցած կատարումներ։ Միջոցառմանը ներկա էին մարզային և քաղաքային իշխանությունների ներկայացուցիչներ, արվեստասեր հասարակություն, ինչպես նաև արվեստաբաններ։ Միջոցառման ավարտին հանդիսատեսը մասնակցեց «Արտացոլված մեղեդիներ» խորագրով նկարչական պլեներին՝ «Ընտանիք» կենտրոնի նկարչական խմբակների սաների հետ միասին։ Կենտրոնի ցուցասրահում ներկայացվեցին «Ընտանիք» կենտրոնի դեկորատիվ-կիրառական արվեստի ճյուղերի ստեղծագործական աշխատանքները՝ ոգեշնչված Խաչատուր Ավետիսյանի արվեստով։ Միջոցառումն անցավ ջերմ մթնոլորտում, իսկ մասնակիցները կիսվեցին իրենց տպավորություններով՝ արժևորելով նման նախաձեռնությունների կարևորությունը մշակութային կյանքի աշխուժացման և ազգային արժեքների տարածման գործում։