Փայտարվեստ

Սովորողների տարիքային խումբը՝ 8-ից 18 տարեկան
Սովորողների քանակը ՝ 7-ից ոչ պակաս սովորող
Ժամաքանակ՝ շաբաթական 6-ից մինչև 8 դասաժամ
Ուսուցման տևողությունը ՝ երեք տարի

Ոսուցման ընթացքում խմբակի սաները սովորում են պարզ երկրաչափական, եռանկյունաչափական, հարթական և տարածական կառուցումներ, փայտատեսակների ճանաչում, աշխատատեղի նախապատրաստում և սպասարկում, փորագրման տեսակներին համապատասխան փորակման գործիքների ընտրում, փորակման չափանշում, գծանշում, զարդանախշի համապատասխանեցում նախապատրաստվածքի չափերին և տեղակայում, փորագրման տեսակների փորակումներ, փորագրված շինվածքի վերջնական մշակում, զարդակիրառական իրերի պատրաստում և ձևավորում՝ զարդանախշային փորագրությամբ, աշխատավայրում, աշխատատեղում և աշխատանքներ իրականացնելու ժամանակ անվտանգության և հակահրդեհային կանոնների պահպանում: Ուսուցման ընթացքում սովորողների մոտ հիմնավորվում և ամրապնդվում է հետևյալ գիտելիքները և կարողությունները ՝

 

• նախապատրաստել և ճիշտ  օգտագործել աշխատանքային գործիքները և պարագաները,

• պահպանել գործիքների և աշխատատեղի  մաքրությունը,

• իմանալ փորագրության  գործընթացի կատարման փուլերը,

• ընտրել զարդանախշեր և զարդապատկերներ, գծագրել էսքիզ,

• Էսքիզում պահպանել փայտի գեղարվեստական փորագրության մասնագիտական պահանջները,

• կատարել կոմպոզիցիայի կառուցում` ուշադրություն դարձնելով կոմպոզիցիայի հիմունքներին,  

• տեսնել, գնահատել և հասկանալ գեղեցիկը շրջակա միջավայրում,

• ծանոթանալ նյութագիտություն առարկային և արվեստի պատմությանը,

• տիրապետել փորագրության  հիմունքներին,      

• շտկել փորագրության թերությունները, կատարել վերջնամշակման, լաքապատման և մոմապատման  աշխատանքներ,

• կատարել վերանորոգման աշխատանքներ,

• պահպանել անվտանգության կանոնները:    
  
  ՈՒՍՈՒՑՄԱՆ ՁԵՎԵՐԸ
  
  Ուսուցումն  իրականացվում է տեսական և գործնական պարապմունքների զուգորդման միջոցով:
  Ուսման ընթացքում ցուցաբերվում է անհատական մոտեցումը նոր ընդունված, թույլ ընկավող, ֆիզիկական խնդիրներ ունեցող սաների նկատմամբ: Դասընթացում կարևորվում է դաստիարակչական աշխատանքների կազմակերպումը՝ ընթերցանությունը, զրույցների անցկացումը, թեմատիկ ֆիլմերի դիտումները, էքսկուրսիան, ցուցահանդեսների, մասնագիտական գիտելիքի փոխանցումը և այլ միջոցառումներ:
  Խմբակում կարող են լինել տարբեր ժամանակում ընդունված սաներ, ուստի յուրաքանչյուր սանին ցուցաբերվում է  տարբերակված՝ անհատական մոտեցում՝ հնարավորություններին, հետաքրքրություններին, հակումներին, ընդունակություններին, առողջական վիճակին և հաճախելության ժամանակահատվածին համապատասխան: Մանկավարժը բացահայտում է սանի գործնական կարողությունները, ըմնբռնում նրա ստեղծագործելու  միտքը, հնարավորություն ընձեռնում սանին օգտագործելու իր ունակությունները: Մանկավարժը բացահայտում է նաև սաների ուղղվածությունը և հետաքրքրվածությունը այլ մասնագիտությունների նկատմամբ: Դասընթացի ընթացքում սաների հետ տարվում է դաստիարակչական աշխատանքներ՝ զրույցներ, քննարկումներ, միջոցառումների նախապատրաստում,  տարբեր մրցույթների պատրասման աշխատանքներ, ստեղծագործական մտքի վերլուծում։
   

  ԾՐԱԳՐԻ ԱՐԴՅՈՒՆՔՆԵՐԸ
  
   

  Ծրագրի շրջանակում սովորողները պետք է՝

• կարևորեն արտադպրոցական կրթության դերը նախամասնագիտական կողմնորոշման մեջ,

• իմանան փայտյա իրերի պատրաստման և  գեղարվեստական փորագրության նկարագիրը, փայտամշակման արհեստանոցի աշխատանքի կազմակերպման առանձնահատկությունները,

• կարողանան ձևավորել գեղարվեստական աշխատանքներ, որոնք կարող են հետագայում դառնալ արվեստի  գործեր,

• իմանան փորագրողի և զարդակիրառական իրեր ձևավորողի  զբաղմունքի նկարագիրը, ուսումնական և մասնագիտական արհեստանոցի աշխատանքի կազմակերպման առանձնահատկությունները,

• կարողանան ընտրել զարդանախշեր և զարդապատկերներ, գծագրել էսքիզ, տեղակայել փայտյա նախապատրաստվածքի վրա և փորագրել,

•  

• կատարեն կոմպոզիցիայի կառուցում, 

• կարողանան պատրաստել փայտյա իրեր, կատարեն երկրաչափական, տրամատային, զարդանախշային, հարթաքանդակային և բարձրաքանդակային փորագրություններ,

• կարողանան ձևավորել զարդատուփեր, մոմակալներ, ժամացույցներ, ափսեներ, պանոներ, խաչփայտեր և այլ դեկորատիվ-կիրառական իրեր,

• կատարեն փորագրված գեղարվեստական իրերի վերանորոգում,

• ստանալով փայտի գեղարվեստական փորագրության համապատասխան գիտելիքներ,   կարողություններ և հմտություններ` ակտիվորեն մասնակցեն  մրցույթ-ցուցահանդեսներին և փառատոններին: